مش صعبانيات -رسالة لعديمي الإحساس

<لو مكسل تقرأإسمع الفيديو إللي تحت>
في الفترة إللي فاتت لاحظت تبلد عدم إهتمام من ناس كتير تجاه الأحداث إللي بنمر بيها في مصر.
الجدير بالذكر إن الناس إللي حصلهم تبلد أو مبقاش فارق معاهم هما مش الشريحة إللي بتتفرج علي أفلام
Saw
وبتاعة الناس إللي بيقطعوا في لحم بعض دول. الناس دي ناس عادية زي الناس إللي جنبك في الميكروباص أو المترو أو أصحابك وقرايبك أو الناس المحيطين بيك في حياتك العادية
والموضوع دا إستفزني,عشان كدا قررت أطرح شوية نقط يمكن الشخص المتبلد لو حطهم قدامه موقفه أو طريقة تفكيره تتغير
يهمني بس أأكد الأول إن النقط دي مش شحاتة للتعاطف أو صعبانيات,,،لكنها شوية حقائق ممكن تفرق مع الشخص وتخليه يتحول لإنسان حقيقي ويختلف تعامله وتعاطيه مع الأمور.
أما تشوف فيديو تعذيب،أو إنتهاك حقوق إنسان أو أي قصة عن واحد تعرض لبطش السلطة أو من هم أقوي .ياريت تحط في بالك شوية نقط
١- إن إللي في الفيديو دا شخص حقيقي
٢-إن ألم إللي حضرتك بتتعرضله غالبا بيكون مدة الفيديو،لكن الشخص إللي في الفيديو ألمه (الحقيقي) بيمتد لبعد كدا بكتير ساعات وشهور وسنين لو خرج عايش أصلاً
٣-إنك ممكن تعمل
pause
أو تجري حتة صعبة أو تقفل الفيديو أصلا أو ماتتفرجش من البداية،لكن اللي في الفيديو دا مر فعلا بكل ثانية في الفيديو ومكاتش متاح قصاده كل الإختيارات إللي قدامك ساعت تصوير الفيديو
٤-إنك ممكن (تأجل) مشاهدة الفيديو،لكن هو يا عيني مش متاح قدامه كدا
٥-حضرتك لو إتعكننت أو عاوز تعدل مزاجك قبل ما تنام ممكن تسمع أغاني أو تتفرج علي حلقة لباسم يوسف عشان مزاجك يتعدل،،بأما الضحية إللي في الفيديو فمعاناته تتعدي العكننة بمراحل
الخلاصة،مافيش خلاصة بصراحة،،أتمني ربنا يحافظ علي جنابك وكل أصحابك.بس أتمني كمان إنك تحط النقطي قدامك،،،،وتتعدي مرحلة مصمصة الشفايف.
مينا ضياء
22/12/2011
1:08am
تابع المدونة علي فيسبوك