جاسوس علي ماتفرج !

الف بركة احنا قبضنا علي جاسوس يا ولاد .. لولولولييي .. فرحة فرحة !!

جاسوس خيطر اوي اوي .. اخطر من غسان مطر كده يعني !

واد رهيب كده و ايه .. بريمو يعني .. عمل اللي مايعمل !!

• 1- كان بيحرض الناس علي انهم يقوموا باعمال شغب تمس النظام العام .. واحد لمض طبعا يقولي ازاي كان بيحرض الناس .. كان بيقولهم يا اخونا بقولكوا ايه ؟ .. ماتيجوا نقوم باعمال شغب و نولع شماريخ و نخربها ؟ .. و عنها فعلا .. الناس تجيب طوب و تضرب في النظام العام ده لغاية لما تجيبه علي الارض .. شغل يهود بقي !

• 2- كان بيوقع بين المسيحين و المسلمين في احداث امبابة .. اه بجد كان بيوقع بينهم ... واحد رخم برضه يقولي ازاي .. بسيطة يا عم .. كان بيشوف اي بلكونة مواطن فيها غسيل يقوم يطلع في بلكونة المواطن اللي فوقيه ... و يرمي مية .. و بتبقي مية مش ولابد يعني .. بس كده ... عشان الناس تقولك ان في مصر فتنة طائفية .. و هو ولا فيه اي حاجة .. و ده اسرائيلي جاسوس هو اللي بيعمل كل ده .. امال الراجل اللي طلع و قال منبقاش رجالة لو مولعناش في كل الكنايس بتاعة امبابة ده يبقي ايه ؟ .. المفاجاة انه جاسوس برضه .. بس جاسوس مصري .. بيتشغل لصالح السنبلاوين .. موضوع كبير اوي يعني !!

و لقوه برضه وسط المتظاهرين الاقباط في ماسبيرو .. راجل انما ايه يعني .. جهمنمي ... موجود في اي حتة عمال يجيب اجوان !!

• 3- و دي النقطة المهمة اوي بقي .. ان الراجل ده هو لوحده ... بطوله يعني من غير مساعدة حد ... بيوقع بين الجيش و الشعب اللي هما اصلا ايه ؟ .. جدعان ايد واحدة .. تخيلوا ؟ ... شوفوا الشر اللي بقي في الجواسيس ؟ .. بيوقع بينهم ازاي ؟ .. سؤال حلو .. بيجيب ناس كده بنات اسرائليات يعني كانوا اصحابه في الكلاس .. الفصل يعني عدم الامؤاخذة و يقولهم اطلعوا قولوا انكوا اتعملكوا كشف عذرية و ده طبعا محصلش .. شغل عالي اوي !!

شوية ملاحيظ :

1- بيقولك الجاسوس ده شارك في حرب لبنان سنة 2006 و اتصاب .. و مش واضح من صورته خالص انه فيه حاجة اصلا .. فايه نوع الاصابة دي بقي ؟ .. رباط صليبي مثلا ؟!

2- هو الجاسوس ده مش برضه بيبقي ماشي عينه في وسط راسه و لا بيمشي يتصور مع طوب الارض .. و في كل حتة في الدنيا .. ... هو اهبل اوي كده و لا هو اتصاب في دماغه ولا ايه ؟ !!

شوية صور عنب للجاسوس العسل !

http://www.youm7.com/News.asp?NewsID=433837

3- انا اذكي من الجاسوس بقي و عرفت اجيب البروفايل بتاع .. البروفايل اهو

http://www.facebook.com/ilan.grapel?sk=friends&v=friends#!/ilan.grapel?sk=info

( البروفايل اتقفل دلوقتي و ده يدل علي مدي التقدم اللي بقت فيه السجون و ان النت دخل السجن خلاص !! )

جاسوس و عامل بروفايل و حاطط صوره و حاجة ايه فوللي .. يعني شوية شوية و هيكتب المهنة جاسوس – فرع مصر – امبابة !!

( صورة البروفايل بتاع الجاسوس قبل مايدخل من علي النت من علي اللاب توب بتاع السجن و يقفله !!)

4- احنا ازاي عرفنا نمسك الجاسوس ده و مش عارفين نمسك شوية بلطجية ؟!!

5-بسم الله ماشاء الله يعني الجاسوس اغلب الصور اللي اتصورها و هو باصص للكاميرا و بيضحك و الجيش يقولك احنا اللي مصورينه .. و هو عادي كده ؟.. بيبص للكاميرا و يضحك ؟ ..يلا و ماله مش عيب !!

6- الجاسوس حاطط علي الاب توب بتاعه صورته و هو لابس لبس الجيش !! .. بوظ سمعة الجواسيس الله يخرب بيته !! .. طيب يعملها هيدن و لا حاجة !!

7- انا الفار بيلعب في عبي بعد التصريح ده!

http://www.youm7.com/News.asp?NewsID=433912

8- واحد يقولي انت بتشكك في الموضوع يعني ؟؟ ... اقوله يا عم انا ماليش دعوة انا مش بشكك و لا نيلة .. انا عندي امتحانات يا عم اسرائيل هي اللي بتشكك .. شوف دي

http://www.youm7.com/News.asp?NewsID=433948&SecID=65

و دي كمان

http://www.dostor.org/politics/middle-east/11/june/13/44941

الجاسوس ده فكرني بنكتة قديمة كده كانت بتقول ان مرة الموساد الاسرائيلي جندوا واحد اسمع عوضين و قالوله انت تروح مصر و تخليك هناك و لما تعوز تبعت حاجة احنا هنبعتلك عميل تبعنا و يقولك كلمة السر و كلمة السر هتبقي" ازيك يا عوضين و ازاي امك ؟ " ... بعد شهر بقي عوضين كان عاوز يبتعلهم حاجة .. راحوا بعتين العميل .. فراح العمارة بيسال البواب .. هو عوضين في الدور الكام ؟ .. قاله فيه 3 عوضين في العمارة هنا .. طلع العميل و خبط علي اول شقة وقاله " ازيك يا عوضين و ازاي امك ؟ " راح الراجل قاله : أااااه.. انت عاوز عوضين الجاسوس ؟ .. لا ده ساكن في التالت !!

بريشة الفنان سامح سمير :)

By Me :)