" ج 3- "ميتيين أهلك.
"ميتيين أهلك" كلمة سيئة السمعة في العامية المصريةوفي معجم السباب المصري تجد الآتي: "- تعبير مُركب من كلمتين أو ثلاثة كلمات,,
-قد يتكون من ثلاث كلمات وتكون الكلمة الأولي من السباب واللعان,وفي هذه الحالة,يكون القائل يقوم بالسب الصريح لك
-وقد تكون من ثلاث كلمات أولهم "هاطلع" و دي معناها الحرفي أنه سيستخرج رفاتهم ويعبث بها أو جثثهم ويمثل بها,,,ويكون المعني المجازي "إظهار القرف"-خاصة إذا قالها أحد الأشخاص علي نفسه
و إذا ذكرت دون كلمة تسبقها قبلها أو تليها بعدها تكون بمعني القرف أيضا أو طز!!
وقد يكون هناك معان أخري باختلاف المكان و الخلفية الثقافية للقائل والمستمع,,"
ولو اتأملت هتلاقي أن أصل فكرة الثأر المنتشرة (مش في الصعيد أو في الفلاحين بس لأ في دول تانية كتير كمان) مبنية أساساً علي الكلمة دي,بس مش علي المعني الحرفي ليها (عشان عندنا الناس إلي حد كبير بتقدر حرمات الموتي وبتقدرها)
اصل فكرة الثأر, إن واحد من عائلة (س) اتقتل علي يد واحد من عائلة (ص) ,
وإللي بيكون في دماغ أسرة (س) الآتي,,:"هما انتقصوا من رصيد "أحياء أهلنا",,لازم نتعادل و ننتقم لقريبنا,و نبعتله حقه ونبعتله حد يونسه في طربته من "ميتيين أهلهم",,وطبعاً ده مش عن طريق الشرطة أو القضاء,لكنه عن طريق الانتقام المباشر,بزيادة رصيد "ميتيين أهلهم"
لحد كدة مفهوم؟!,,,,عظيم.
بعد أحداث نجع حمادي في ليلة 6/1/2010 السابقة كنت باحكي مع رامز كمال فقال لي انه حاسس انه بيحب عائلته,بس عائلته بتكرهه و بتقرفه, علطول جه في بالي المعني المجازي للكلمة (تاني وتالت معني في المعجم)
وافتكرت مرة كنت عند جدي وجدتي –الله يرحمهم- ساعتها كنت صغير قوي وكان يوم خميس وكنت عاوز اشغل التليفزيون أشوف حاجة ملحاجات العقيمة بتاعت تليفزيون ال"ريادة والتعتيم",ولقيت جدي وجدتي رفضوا اني اعمل كده,عشان كان فيه عزي شغال جنبنا والقرآن شغال.ساعتها اتخنقت منهم اوي وطلعت علي البلكونة أتفرج علي العيال إللي بتلعب كورة في الشارع,ولسان حالي بيقول (يعني هوا كان من بقية أهلنا!!)
افتكرت جدي عشان فطرته النقية و السليمة,,إللي كت فحواها إن العزي ده مش بتع حد جارنا,لأ دا بتع حد من "ميتيين أهلنا" كمان,,
ولقيت إن فطرته دي المفروض تتعمم,,وتنتشر,,
يعني الشعار بتع "النسيج الواحد" خلاص كلته العتة,و الإشتغالة بتعت عنصري الأمة بقت ماسخة!!,,لقيت إن
جدي الله يرحمه هو إللي كان عنده الوصف الصح
يعني أما واحد بيبقي داخل وناوي يزود "ميتيين أهلهم" وفاكر إن رصيد أحياء أهله هايفضل زي مهوا (أو علي الأقل عليبال ما ياخدوا بتارهم )يبقي غلطان, ده في ساعتها وفي نفس اللحظة رصيد "ميتيين أهله بيزيد" وبيتناقص رصيد "أحياء أهله" لإن من المفترض زي مكان رأي جدي إننا عائلة واحدة كبيرة.و رصيدنا واحد في الأحياء والموتي,و أصدق صفحة في جريدة الأهرام شاهدة علي كدة!!
يعني المفروض إن ضحايا الكشح,والعبارة وقطار الصعيد,ومروي الشربيني والمجندين المصريين إللي علي الحدود(إللي شباب إسرائيل وحماس بيلعبوا عليهم نشان) وشهداء الجيش المصري في حروبه من أول ماخترعوا الجيش لحد حرب أكتوبر (طبعاً والأسري المصريين إللي اتقتلوا ف 1967) وأخيراً ضحايا نجع حمادي, بل وأكثر هما
أيضاً "ميتيين أهلنا"
والناس إللي جريوا في الشوارع في السودان و ال
cowboys
الجزائريين المغاوير الشجعان بيطاردوهم كأنهم بيطاردوا الهنود الحمر (مع الإعتذار للهنود الحمر) دول "متعورين أهلنا" و"مهانين أهلنا" وكان ممكن يبقوا من "ميتين أهلنا" وينضموا لكرامة بلدنا.
لو حضرتك اتفقت معايا في الأمثلة إللي فاتت دي,يبقا إحنا في أمل عندنا,إما لو اختلفت,فأنصحك بمراجعة ضميرك.
وأنا باقترح إن يبقي شعار المرحلة الجاية هو "ميتيين أهلنا"!!
كده يبقي إللي عاوز أقوله خلص,,,,,,,,,,,,
--------------------------
بالمناسبة يعني,,,:
كان عاجبني إعلان "بنك مصر"-"بنك أهل مصر"
وحسيت إنه متاخد من عدة مانشيتات للصحف,مثلاً:
يبقي فيه أحداث فتنة طائفية في مكان ما,وتلاقي "مصر تحاول رأب الصدع الفلسطيني و التوفيق بين فتح وحماس-وميتيين أهل مصر-"!!!!!
--------------------------
إعلان في صفحة العقارات في الوسيط:
"مش لاقي شقة تسكن فيها؟ !مشششششش مشكلة تعالا احجز عندنا مقابر ترد الروح,تعالا اسكن عند "ميتيين أهل مصر"!!!!!!
--------------------------
مش مشكلة الأكل مسرطن المية فيها مجاري,مدام هايستهلكها "ميتين أهل مصر",,أصلهم لو كانوا أحياء كان هايكون فيه كلام تاني
--------------------------
مش مشكلة برضوا أما الحكومة تتعسف مع واحد تكتشف بعد كدة أنه مش من "ميتيين أهل مصر",وأما تخسر
القضية وتدفع الغرامة من فلوس دافعي الضرائب إللي من "ميتيين أهل مصر"
--------------------------
مش مشكلة أما البيئة تبقي ملوثة,,متخافش,,"ميتيين أهل مصر"مش بيحتاجوا هوا نقي,,,مش ميتيين!!
وأما تبقي من "ميتيين أهل مصر" و تدفع ضرائب و متستفدش بيها لا في الصحة ولا الخدمات ولا التعليم ولا الأمن,,متخافش,, الميتيين مش بيحتاجوا علاج,ولا علام,ولا أمن. خلاص يعني يوم الحساب قرب وكل واحد يروح لحالة.
(ممكن يبقوا بيحوشوهالك عشان الدفنة)
أو تريح دماغك.و تطنش انك من "ميتيين أهل مصر",و تعتبر نفسك من "ميتيين أهل الدنيا"
--------------------------
مش قصدي صدقني أحسرك علي نفسك.
بس معلش,قارن كدة مابينك ومابين "جلعاد شاليط" المجند الإسرائيلي,أهو ده واحد من " أهل اسرائيل",,شوف بلده "المغتصبة التوسعية الإستعمارية" بتحارب إزاي عشان تجيبه أو رفاته ,,مطليب حياً أو ميتاً عندهم,عشان عندهم ليه قيمة,,
لو أنا او حضرتك كنا في موقف شبهه,,,تفتكر كانوا هيعملوا إللي الدولة التوسوعية دي عملته (رغم سجلها الفادح في جرائم الحرب وانتهاك الإنسانية المزعزعة),,هيعملوا كدة عشان واحد من "ميتيين أهل مصر" (قارن بين نعتك ونعته) (وقارن بين نعيك ونعيه!!)
--------------------------
اما منافسش أمريكا واسرائيل في الختراع والعلم و صناعة السلاح
ولا ننافس اليابان في التصنيع الحجات المتقنة
ولا الصين في الحجات المتوسطة و القليلة الكفائة (حجاتهم النضيفة مبتجيلناش)
لكن ننافس الهند و الفلبين في إقتحام السوق الخليجي وإغراق السوق بالخادمات المصريات يبقي بينقول,,,,أيوة
--------------------------
اتفاجئت لما لاقيت ان "ميتيين أهلك" هي الشتيمة والحل وكمان نمط قيادة,وممكن تبقي اسلوب بيع وتسويق؟
مينا ضياء
واحد من "ميتيين أهل مصر"
12/1/10
2:44 pm
دي كانت شوية افكار جت في بالي في الفترة إللي فاتت عن قيمة "ميتيين أهل مصر".
رسوم سامح سمير
No comments:
Post a Comment