إلي العزيز

إلي العزيز

عزيزي حبيبي ياللي فوق,

وإلي كل عزيز مرزوق

لو سمحتلي كده بهدوء

مش عيب, تقولنا امشوا سيبوها,,,

مش عايزينكوا فارقونا هاوها,

وإحنا نسيبكوا كدة بالذوق

أستاذنا المتحكم بكل الأمور

لو عاوزنا من وشك الكريم نغور,هانغور

خليك شجاع,قدام الشبعانين,وقدام الجياع

خليك جرئ,وبلاش علينا تلف تدور

بس إعرف ياحلو, منغيرنا انت معوق,أكتع

ودي أخر مرة باقلك إسمع

انت ممكن تطردنا,

تخلي أملنا عليطول مكسور

وياكلنا إحباطنا المسعور

وأصناف المر تخلينا ندوق

بس منغيرنا وش هاتلبس

وإلبس وحدك يا حلو الخازوق

عزيزي المتحكم ومعاه ال remote

مش معني إنك دوست Mute

إننا صوتنا في زورنا هايخفي ,أو جرح مصايبك فينا هايشفي,

أو ننسي امتي بتقسي,,علينا وتفعص

وإمتي تطبطب وإمتي تظبط وإمتي بترقص وإمتي بترفص

أو نتلهي,في حياتنا حزانا,نعد بشغف إمتي هاتخلص,

وانت فيها عمال بتنغص,

عشان ننسي حقوق وحقوق

كل مظلوم مقهور محروق

ومليون واحد تحتيك مسحوق

وألف برئ خليته يموت

.

مينا ضياء

11/6/2010

4:57pm

(إهداء خاص إلي خالد محمد سعيد)