مناقشة هادئة عن إشتباك 8\7 بين الإخوان والحرس الجمهوري.

من شوية كنت في جلسة لطيفة كان فيها مفاجأة ألطف مع ناس نصهم علي الأقل ليهم ممارسة أو دراية بالعمل الحقوقي,,ووقعنا في إختلاف بخصوص تعريف إللي جري الصبح 8\7 فيما عرف إعلاميا بإسم "معركة\مجزرة الحرس الجمهوري"

(مع التشديد علي إني ضد عقوبة الإعدام وضد التجنيد الإجباري والحروب بشكل عام ومع التسليم بعجزي عن الأخرانية بالذات عشان مفيش جنيرال بيتصل بي فالتليفون يسألني قبل مايحارب إيه رأيي)

حصل خلاف علي تعريف الحدث بتاع صدام الإخوان المسلمين بالحرس الجمهوري أثناء المعركة الفاشلة التي بدأها الإخوان لتحرير الأميرة النائمة محمد مرسي.

الخلاف فكرته: هل إللي جري الصبح جريمة إرتكبها خارجين علي القانون وتصدي ليها جيش نظامي  أم معركة بين جيش نظامي وميليشيا؟

السؤال دا جه بسبب إختلاف تفسيرات أعداد القتلي,,,بين إنها عنف مفرط تجاه مجرمين أو معركة غير متكافئة بين جيش نظامي وميليشيا مسلحة قليلة الكفائة (ودي مش مشكلتنا لكنها بالطبع مشكلة القادة).

إمتي تطلق علي الميليشيا إنها ميليشيا أصلا؟ هل درجة التسليح والكفائة القتالية ولا السلوك القتالي فيما يخص التنظيم والإدارة ووجود قيادة لها هدف أو أيديولوجية وعلم ويمكن زي موحد كمان (شبيبة هتلر\جزب الله\الكتائب...إلخ؟)

طيب وجود مجموعات من الأشخاص بتتبني نمط الميليشيات في كل شئ لكن كفائتهم متدنية..هل دا ينفي عنهم الصفة ولا لأ؟ يعني المفروض أقوله حظ أوفر فالمرات القادمة وأطلع لقائدهم ليستة بالغلطان الإستراتيجية إللي إرتكبها وبسببها موت جنوده عشان يتلافاها فالمرة القادمة بحيث يقدر يعمل ((المعادلة))ويتنقل من التصنيف الإجرامي للتصنيف العسكري الغير نظامي؟ يعني أقوله :لازم توصل للحزام الإسود عشان أصنفك ميليشيا؟

بلاش..هل الجهاديين في سينا ميليشيا ولا مجرد خارجين علي القانون ((فقط)) (لاحظ إن في دولة بتجرم تكوين الميليشيات والإنضمام ليها دا بالتأكيد خارج علي القانون بس هل هو يعتبر ميليشيا عسكرية أم لا؟) –لاحظ إن ماحدش إعتبر التدخل العسكري للرد علي الجهاديين :قوة مفرطة.

الهدف من السؤال العام كان الإجابة علي السؤال الخاص..هل الحرس الجمهوري إستعمل قوة مفرطة؟

(بخلاف الأكلاشيهات اللي بتحكي عن:حرمانية الدم ومع التسليم بأهمية الروح الإنسانية وعدم الحق لاي إنسان في سلبها من إنسان تاني...)

الفكرة ببساطة إنه لو إعتبرت إنهم مجرد مجرمين (زي أي ناس في أي خناقة) فدا بيعني وجوب التعامل معاهم بحيث يتم تعجيزهم (شل قدرتهم علي القتال بإصابتهم لكن بدون إصابتهم إصابات قاتلة) وبالتالي فدي قوة مفرطة. لكن,,لو صنفتهم بإعتبارهم ميليشيا حربية, فدا معناه إنهم قوات قتالية غير نظامية حصل ودخلوا معركة غير متكافئة (عكس معاركهم في سينا) من حيث عدم مساندة الأرض لهم وعدم القدرة علي إستخدام درجة التسليح المتاحة ليهم في سينا؟ وعليه فذنب العناصر إللي قتلت في رقبة قياداتها إللي غامرت بيها بإعتبارها بيادق مكررة وغير مهمة.

طيب لو نفس العنصر إللي بيقاتل في سينا عدي قناة السويس ودستة من أصحابه دول يعتبروا ميليشيا في سينا لكن مدنيين مجرمين داخل حدود القاهرة؟

يعني شخص بيري في ما يسمي ب"الجيش السوري الحر" مثل أعلي يحاول تطبيقه بصور مختلفه,,هل الجيش السوري الحر ميليشيا\ت ولا لأ؟ وهل هتعتبر اللي بيحاول يقلده ميليشيا لمجرد إنه حاول (سواء نجح:إستولي علي مدن أو فشل:حياته خلصت في معركة)؟ ولا هتعتبره ميليشيا لما يوصل لحد أدني من العدد والعتاد ويبقي لحد قبل مايصل للحظة دي: ميليشيا تحت الإنشاء؟

أنا شخصيا محتار وبفكر بصوت عالي...كل الأراء مقبولة مع التشديد إلي إني النقاش دا إعتبرته فرصة للمراجعة الأخلاقية والضميرية ومش ناوي أنحاز بخلاف ضميري لأي طرف من الأطراف فيما يعرف فالعامية المصرية بالتعريص..ما علينا.

للأمانة أول مرة أفكر في السؤال دا كان وقت معرفتي بإقتحام جامعة القاهرة وإستعمال أسطح مبانيها كمنصات للهجوم علي سكان بين السرايات..بعدما أعلن مرسي الحرب في خطابه.

طبعا السطور الموجودة أعلاه مش معناها:"إيه إللي وداها هناك؟" إلي أخر هذه الإتهامات المهرتلة,,,هي بس وقفة مع النفس ومراجعة لشوية تعريفات

ليلة سعيدة وأتمني ترد فالتعليقات وتعبر عن إجابتك (إللي واصلها لغاية دلوقتي-ولو وصلت لإجابة تانية بعدين جاوب تاني مش مشكلة) ومتعبرش عن رأيك في ميتين أهلي عشان مش فارق معايا في حاجة :) 

* أتمني لأسر الضحايا التعزية علي فقد أحبائهم لإن كل قتيل هو محور حياة أحبائه بشكل أو بأخر. نتمني لهم الصبر*

مينا ضياء

8\7\2013

8:00 Pm

تابع المدونة علي فيسبوك

إقرأ أيضا:
وائل عباس يكتب: جمهورية فايمار
ما بعد السقوط... توثيق أحداث دار الحرس الجمهوري الدامية فجر 8 يوليو 2013