أغلب أطفال مصر تقريبا إتعلموا حاجتين علي
التوازي,,,
والحاجتين دول واحدة منهم بتمثل أبسط صور السلطوية إللي طفل ممكن يتعرضلها بإعتبارها ليها أساس ثقافي\ديني\مزاج الأب أو
الأم أو المربي\ة.
في سن معين الطفل بيتعلم إن إيده اليمين هي
إللي بياكل بيها (أنهي اليمين وأنهي الشمال؟ طب لخبطهم كدا؟و, ها أنهي؟) ,,وبيعتلهم
كمان إنه ياكل بإيده اليمين علشان...
بيكبر شوية وبيتعلم إن إيده اليمين هي إللي
بيكتب بيها,,,وإنه يكتب بإيده اليمين...
لو لعب بينج بونج لو أهله لسة فيه الهاجس دا
في دماغهم, ممكن يفرضوا عليه يلعب بإيده اليمين,,,وفي أوساط كتير بيتكرر الشخص
العجوز إللي بيحكي إنه إبنه كان بيلعب\بياكل\بيكتب بالشمال,,بس هو(الأب بيتكلم عن
نفسه بمنتهي الفخر) كان بيربط إيد الولد عشان يجبره "يقوي إيده اليمين"
وبغض النظر عن تفاهة القصة واللي بيحكيها عن
نفسه بمنتهي الفخر,,
فهو ولأسباب دينية أوثقافية أو مزاجية بيكون
شايف إن الأشول تعريفه هو:إللي إيده اليمين ضعيفة.
مع إن التعريف الصحيح هو:إللي إيده الشمال
قوية,,,لإن بنفس المنهج المعتوه ممكن نقول إن الأيمن هو:إللي إيده الشمال ضعيفة
بدل منقول إن إللي إيده اليمين قوية,,,!
مع العلم إن مشاهير كتير نوابغ معروف إنهم Left handed وبشكل عام فريقك المفضل في أي
لعبة بتتفرج عليها في مصر مستحيل يكسب إلا لو كان فيه علي الأقل 2 لاعيبة Left handed.
علي صعيد أخر.. هحكي تجربة شخصية سريعة.
من فترة كنت مع ولد صاحبي في محل وجبات
سريعة,,المهم كنا واقفين علي الرُخامة وبناكل (زي أي حد),,المهم لقيت واحد بعيد
علي الطرف الأخر من الرخامة بيقولي شئ وبيشاورلي وأنا مش سامعه,,
كان قدامي المنيو,,إفتكرته بيطلبه مني فمسكتها وقدمتهاله
وبقوله:"إتفضل" لقيته بكل هدوء بيقولي:"كل يإيدك اليمين"
مسمعتهوش,,قلتله:"إيه؟"
قاللي:"إنت بتاكل بإيدك الشمال"
الصراحة مصدقتش ودني فقلتله:"إيه؟"
قان قاللي :"كل باليمين"
فقلتله:"وإنت مالك؟"
"إيه؟"
"وإنت مالك؟"
"إيه؟"
"وإنت مالك؟" (مطولة)
إنبهر وقاللي:"أنا كنت بنصحك!"
سألته:"إنت تعرفني عشان تنصحني؟"
المهم تدخل ولاد الحلال منهم صاحبي والموقف
إنتهي.
علي فكرة,,كتبت الكلمتين دول بإيدي اليمين
وكنت باكل بالشمال :P
مينا ضياء
12\2\2013
11:48
pm
No comments:
Post a Comment