(لو مكسل تقرا ممكن تسمع الأيتم تحت البوست)
جعان؟؟
لو مش جعان روح وتعالا أما تجوع,,
ممكن تاكل إيه؟
ممكن تاكل
خشاف
كبدة وسجق
فول وطعمية
بابا غنوج
كشري
لحمة راس وكوارع
رز باللبن
فرخة مشوية
كباب وكفته
سندوتشات الجبنة بأنواعها
بيض بالبسطرمة
سوسيس لامؤخذا
وأنواع تانية كتير,,,إختيارك غالبا هايتحكم فيه عدة عوامل,,
أولها العامل الإقتصادي
تانيها نفسك واخداك لفين
تالتها (لو لسه بتتقرف) يبأة مدي نضافة أو وساخة المكان إللي هتاكل فيه.
وعوامل تانية لا داعي لذكرها.
خليك فاكر إنك وسط العوامل دي كلها لسه حر انك تختار الصنف المناسب لحالتك المادية ونفسك شداك لفين.
في الوقت إللي إنت قاعد بتختار تاكل إيه بمنتهي الحرية.
فيه شخص مضرب عن الطعام عشان مارس حريته في إنه يعبر عن رأيه وأفكاره.
الشخص دا أخد 3 سنين سجن عسكري قضي منهم 5 شهور.
الشخص دا بسبب إنه أراءه بتعتبر مستفزة لناس كتير,,,الناس الكتير دول تخاذلوا في إنهم يتضامنوا معاه,,,مع إنهم مش عارفين إنهم أما يوافقوا علي إللي حصله دا هما كدا وافقوا ضمنيا علي إنهم يواجهوا نفس إللي هو بيواجهه بس الموضوع مسألة وقت..
معلومة مهمة,,الشخص دا ماتحكمش عليه بال3 سنين سجن عشان أي رأي من أرائه "المستفزة",,ولكن تهمته كانت
1) اهانة الموسسة العسكرية ---->لما قال يسقط يسقط حكم العسكر
2)نشر اخبار كاذبة ----> 1-اختبارات كشف العذرية للبنات . 2- ان الجيش دخل ذخيرة للداخلية يوم 28
مايكل بسبب إنه عنده بعض الأراء المستفزة,,أصبح ثغرة تمكنوا عن طريقها إيجاد سابقة قانونية لمحاكمة صاحب رأي وسجنه. وبكدا إتفتح باب المحاكمات العسكرية للمدونين والصحفيين إللي لحد دلوقتي مش عارفين نقفله.
مايكل داخل دلوقتي علي اليوم التالت في إضرابه عن الطعام,,,ياللا روح كل,,بالهنا والشفا.
صحيح..لو حضرتك هاتربط بين إسمي وبين البوست دا وهاتخمنن إنه بشكل أو بأخر إتسبب فيه,, أتمني إنك تنساني تماما وتمسح موبايلي من عندك وتشيلني من عندك علي التويتير أو الفيسبوك عشان مش طالبة معايا وحياة أبوكوا.
مينا ضياء
24/8/2011
11:00 pm
Great job ya Mina, very touching, very smart!
ReplyDeleteلا للمحكمات العسكرية
ReplyDeleteFirst they came for the communists,
ReplyDeleteand I didn't speak out because I wasn't a communist.
Then they came for the trade unionists,
and I didn't speak out because I wasn't a trade unionist.
...
Then they came for the Jews,
and I didn't speak out because I wasn't a Jew.
Then they came for me
and there was no one left to speak out for me..
Pastor Martin Niemöller (1892–1984)