خلاص
عادي يعني
إيه وجعني؟!
فُكك,,خلاص
ما علينا
لأ مش فاضي
أيوة راضي,
ونازل أشتري هدوم العيد,,
وماله يا عم!
إيه بس كان يعيبوا!
ديجافوا قديم
ديجافوا جديد
أهم حاجة في الديجافوا الإخلاص,,,وخلاص
حلو الكلام, عن الوطن,
وعن السلام,
لكن بعد كتر الزاحم بين الحروف والورق والسطور,,,
تلقاه أخيراً,,برضوا كلام,بس هجاص,,
--------------------------
يقول
"أيوة أنا مسيطر!
أنا الأغلبية في البرلمان
أنا الإنجازات,,أنا المواطنة,وأنا البتنجان,,
أنا مولود في القصر العيني,في وسط البلد,,
أول ما اتولدت خالتي زغردت,,طلعت لأبويا قالته مبروك,,جاللك ولد
ظهر عراف بلدنا وقال :"ولد الوليد,طبعه عنيد,يده من حديد,,,,فقط وبس علي من يريد"
المهم,,
أنا مولود ومن فوقي القبة,,
تحتي القانون,,جنبه السيفون,,إيه أشرب إيه؟؟,,,ممكن ليمون"
"أنا وانت عارفين كويس,,
إنه الفشل,
وإنه الدجل,,
إنه مجرد ماكيت إنجازات,
إنه بيستمد قوته
مالخزعبلات,
وإنه مش أكتر من كلام,ببلاش,,
تسأله عن العَمل يقولاك بلاش
بلاش عمل
هايجيب زعل
هايجيب طموح
وكتير حاجات
إما شالها من جوانا بالزوق,
يإما قتل"
--------------------------
خلص كلامه,,,
أنا نازل هاشتري الهدوم
أيوه أنا عارف إن فيه حاجات أهم,,وفيه حاجات تجيب الهم,,
نبات تزرعه وتبات,
تلقاه طرح شجر الهموم,,
سحب كتير اتجمعت عملت غيوم,,
قدام المحلات محتار اجيب إيه!
اشكال وألوان بكام جنيه,,
بس للأسف مش لاقي حاجتي,,
باقول لصاحبي,,
:"إيه العمل؟,
تفتكر أشتري من إللي موجود وخلاص,,,رفض بشدة وجرني
إتخانقنا جامد وصوتنا عليٍ
"يابني سيبني عاوز اشتري"
قاللي :" يا صاحبي بلاش
دي قمصان معمولة من قماش,,"
قلتله :"أنا هاجيب من المجود وخلاص"
قاللي :"عشان خاطري ماتشتريهاش,
يابني دلوقتي لا مفَر ولا مناص
غيرانك تجيب
خوذة فولاذ
و قميص واقي من الرصاص"
مينا ضياء
1/1/2011
4:24 am
للأسف الفكرة الأصلية للشخابيط إللي فوق دي,موجودة عندي من 6\1\2020
بس كنت مقرر احتفظ بيها لنفسي,,عشان حستها سوداوية ومش واقعية,,
مينا مجدي ورامز كمال شهود علي ده.
Photo by:Marco Maximus
